Студенттік өмір

Студенты Satbayev University

Сәтбаев университетіндегі студенттік өмір қызыққа өте толы. Республикалық жоғары оқу орындары арасындағы ең үздік, әрі қызықты студенттік өмір үшін берілетін сыйлықты университет талай жыл қатарынан ұтып алып отырды. Жыл сайын университетте Студенттік кәсіподақ ұйымы және Жастар комитетінің қолдауымен «Күзгі бал», «ҚазҰТЗУ аруы», КВН секілді көңілді кештер өткізу дәстүрге айналған.

Студенттік қауымдастықтар

Сәтбаев университетінде студенттік қауымдастықтар мүшелерінің қызықты да белсенді өмірі көптеген мүмкіндіктерге толы. Мұнда студенттер болашақ жұмыс берушілермен танысып қана қоймай, өздеріне қажетті мол іс-тәжірибе де жинақтайды. Жыл сайын қыркүйек айында дәстүрлі «Студенттік қауымдастықтар жәрмеңкесі» өткізіліп, онда қауымдастық мүшелері өздерінің клубтары, алдағы жоспарлары туралы айтып, жаңадан келген студенттерді өз қатарларына қосылуға шақырады.

 

«Жас Отан»

«Нұр Отан» партиясының «Жас Отан» жастар қанаты Сәтбаев университетінде 8 жылдан артық қызмет етіп келеді. Бұл қоғам студенттер арасында әртүрлі мәдени іс-шаралар, атап айтқанда, спорттық жарыстар, мәдени байқаулар, депутаттармен және белгілі бизнес өкілдерімен кездесулер ұйымдастырады. Жыл сайын партияның қолдауымен «Жас Отан» кубогы чемпионаты өтеді. Сонымен қатар партияның белсенді мүшелері топтасып, оқуда артта қалған студенттерге көмек қолын созады.

 

«Волонтерлар лигасы»

Мұнда қоғамға жақсылық істегісі келетін, ой-өрісі мен мүддесі ортақ жастарды бір шаңырақ астына топтастыруға талпынған студенттер жиналған. Олар қоғамдағы әлеуметтік мәні зор іс-шараларды ұйымдастырып, өздері соған белсене қатысады: әртүрлі әлеуметтік мәселелер жөнінде акциялар жүргізеді, семинарлар мен шеберлік сағаттарын, тағы басқа да іс-шаралар өткізеді.

 

Пікірсайыс клубтары

Сәтбаев университетінде студенттік екі пікірсайыс клубы жұмыс жасайды: Technokrat және Intellectual Debate Club. Technokrat клубы қазақ тілді студенттерге арналып құрылған. Ал Intellectual Debate Club – Алматы қаласындағы он бес жылдық тарихы бар алғашқы пікірсайыс клубы. Оның мүшелері Алматы мен Астана қалаларында өтетін барлық турнирлерге белсене қатысады. 2015 жылы Intellectual Debate Club жаңа келгендер лигасының кубогын ұтып алып, «Бэта-лига-2016» және «Фантазиялар турнирі» кубогында жеңіске жетті.

 

Enactus

Халықаралық коммерциялық емес ірі ұйымның қызметі студенттерді бизнеске қарай жұмылдыруға бағытталған. Мұнда студенттер халықтың тұрмыс-тіршілігін жақсартуға арналған әлеуметтік жобаларын көпшілікке ұсынып, соны іске асырады. Ал жобалардың тақырыбын, санын, көлемін және іске асыру мерзімін команда мүшелері өздері таңдап алады. Бұл бағытта студенттерге ірі-ірі бизнес өкілдері, кәсіпкерлер мен топ-менеджерлер және кураторлар көмектеседі.

 

Society of Automotive Engineers

Society of Automotive Engineers (SAE) қауымдастығы инженерия саласында машықтанып, өздерінің іс-тәжірибелерін, жобаларын жүзеге асыруға талпынған жас инженер-мамандарға арналып құрылған. Бүгінгі таңда қауымдастық құрамында 121 000 мүше бар – олар дүние жүзінің 97 елінен жиналған инженерлер, басшылар, оқытушылар мен студенттер. Инженерлік біліктілікті арттыруға бағытталған көптеген іс-шараларды, семинарларды, техникалық тақырыптағы симпозиумдарды және электронды түрде білім алуды да SAE ұйымдастырады.

 

American Association of Petroleum Geologists

Бұл әлемдегі мамандандырылған ең ірі геологиялық ұйым. Ол 1917 жылы геологиялық ғылымды дамыту, әсіресе мұнай мен табиғи газ кен орындарын, басқа да жерасты сұйықтары мен минералды ресурстарды барлау мақсатында құрылған. Қауымдастық мүшелері геология саласы бойынша тереңдете білім алып, олардың ғылыми зерттеулеріне көмек көрсетіледі.   

 

Психологиялық қызмет

Студенттер арасында достық, сыйластық қарым-қатынас болып, олардың жеке тұлға ретінде дұрыс қалыптасуы үшін университет тарапынан белсенді түрде психологиялық жұмыстар жүргізіліп тұрады. Осы мақсатта құрылған «Инсайт» психологиялық клубы 2011 жылдан бастап белсенді түрде жұмыс жасап келеді. Сонымен қатар университетте жеке психологиялық бөлме ашылып, онда психолог-маман қызмет көрсетеді. Әсіресе жаңадан келген бірінші курс студенттері мен жатақханада тұратын студенттерге ерекше көңіл бөлінеді.

Сондай-ақ жеке бастың мәселесі жөнінде де, өмірде биік жетістіктерге жетуді армандайтын студенттерге де жеке психологиялық көмек көрсетіледі. Әрбір студент кез келген уақытта психолог-маманның көмегіне жүгініп, кеңес алуына болады. Арадағы әңгіме тек қана құпия түрде жүргізіледі (психолог-маманның кабинеті университеттің студенттік қалашығында орналасқан).

 

Кәсіптік бағдар және жұмысқа орналасу

Производство АО "НАК "Казатомпром"

Сәтбаев университетіндегі кәсіптік бағдарлама студент бірінші курсқа оқуға түскенінен бастап, яғни оның көптеген жарыстарға қатысып, өндірістік тәжірибеден өту кезінен басталады. Университет өзінің серіктес компанияларымен 460 келісім-шарт жасасқан, оның 65 түлектерді жұмысқа орналастыру жөнінде жасалған.

Оқу бітіргеннен кейінгі 3 айда түлектердің 55%-ы, ал 6 айдан кейін – 90%-ы жұмысқа орналасады. Олардың 88%-ы өздері өндірістік іс-тәжірибеден өткен кәсіпорындар мен мекемелерге орналасады.

Сонымен қатар университетте студенттерге өндіріс пен бизнес саласында жетістіктерге жетуге көмектесуге арналған көптеген бағыт-бағдарламалар бар. Солардың бірі – Be Smart In Business қауымдастығы. Бұл қауымдастық студенттерге жақсы жерде тәжірибеден өтіп, білімін шыңдауға көмектессе, жұмыс берушілерге білікті мамандарды таңдап алуға көмектеседі.

2017 жылдан бастап университетте «Сәттілік зертханасы» жобасы іске қосылып, жұмыс істеуде. Бұл да студенттерге жұмыс берушілермен жақынырақ танысып, жақсы қызметке орналасуға мүмкіндік береді. Жоба бойынша нарықтағы кәсіби мамандар өздерінің шеберлік сағаттарын онлайн түрде жүргізіп, студенттерге өздері туралы түйіндемені дұрыс толтыруға, жұмыс берушімен дұрыс келіссөз жүргізуге, этикет пен мінез-құлық нормаларына үйретеді.  

Жоғары

Қате кетті!

Жолдарды дұрыс толтыруға тырысыңыз.

Сіздің мәліметтеріңіз сәтті жіберілді!

Жақын арада біз Сізбен хабарласамыз.