Сәтбаев университеті мен үшін жай ғана университет емес — ол менің тұлға, зерттеуші және ғалым ретінде қалыптасуымның бастау нүктесі болды. Алғашында мен мемлекеттік грантқа іліге алмадым. Алайда дәл осы жағдай менің ғылыми ізденіс жолымның бастамасы болды. Өз шектеулерімді еңсеріп, зертханада өткізген сансыз түндер мен қажырлы еңбектің арқасында көздеген мақсаттарыма жеттім — алғашқы семестр соңында GPA көрсеткішім 3.5 болып, грантқа ауыстым. Бұл жетістік маған еңбек, тәртіп және өз-өзіңе деген сенім кез келген нәрсені өзгерте алатынын дәлелдеді.

Бірақ мен мұнымен тоқтаған жоқпын. Келесі мақсатым — GPA көрсеткішін 4.0-ге жеткізу болды, және мен бұл нәтижеге үшінші оқу жылымда жеттім. Бұл мен үшін маңызды сәт еді: грантта оқу — баяулау емес, керісінше, одан әрі алға ұмтылуға ынталандыратынын түсіндім.

2024 жылдың соңында мен Сәтбаев университетінде басталған ғылыми жұмысымды жалғастырып диссертациямды сәтті қорғадым. Бүгінде мен 2025–2027 жылдарға арналған «Жас ғалым» ғылыми грантының иегерімін, бірнеше ғылыми жарияланымдардың авторымын және менің h-индексім 7-ге тең.

Мен Сәтбаев университетіне осы ерекше жол үшін шексіз ризамын. Бұл жерде мен тек білім ғана емес, сонымен қатар сабырлылықты, табандылықты, ізденіс рухын және елімнің ғылымы алдындағы жауапкершілікті үйрендім. Бүгінде Қазақстанның ғылыми әлеуетін дамытуға өз үлесімді қоса отырып, үлкен мақтанышпен айтамын: менің ғалым ретіндегі жолым дәл осы жерде — Политехте басталды.