Біз – дарамыз: Қазақстан металлургтер қауымдастығы Сәтбаев университетінде «Металлургия» бағыты бойынша Республикалық олимпиада өткізді

Сәтбаев университетінде «Металлургия» бағыты бойынша Республикалық пәндік олимпиаданың екінші кезеңі өтті. Бұл іс-шараға еліміздің түкпір-түкпірінен үздік студенттер мен оқытушылар келді. Қатысушылар Ұлықпан Сыдықов атындағы Шығармашылық орталықта жиналып, кәсіби қауымдастық аясындағы диалогты жалғастырды, әрі жас металлургтерге үлкен кәсіби өмірге жолдама берді.

Олимпиаданың ашылу салтанатында Ө.Байқоңыров атындағы Тау-кен металлургия институтының директоры Қанай Рысбеков құттықтау сөз сөйлеп, болашақ мамандардың инженерлік құзыреттері мен практикалық дағдыларын дамыту өте маңызды екенін атап өтті. Оның ойын белгілі металлург, академик, профессор Болотпай Байымбетов жалғастырып, студенттерге жігер беретін үндеу жасады:

«Металлург болу үшін жан-жақты білім қажет, – деді профессор. – Бұл өте күрделі, көп қырлы және нағыз беделді мамандық. Өйткені қазіргі жасанды интеллект дәуірінде де ол өзектілігін жоғалтпай, жоғары сұранысқа ие болып отыр, әсіресе инженер оны тиімді пайдаланып, оның мүмкіндіктерін игере алуы керек».

Олимпиаданы ұйымдастырушы, «Металлургия және пайдалы қазбаларды байыту» кафедрасының меңгерушісі, қауымдастырылған профессор Мадина Барменшинова өз сөзінде металлургия – Қазақстанның негізгі салаларының бірі екенін атап өтті. Оның айтуынша, бұл салада кадр тапшылығы әлі де орын алып отыр, сондықтан мұндай олимпиадалар жоғары оқу орындары арасындағы ынтымақтастық қарым-қатынасты нығайтып, еліміздің индустриялық дамуына қажетті мамандарды даярлауға ықпал етеді.

«Металлургия – бәсекеге ең қабілетті салалардың бірі, ол экспортқа бағытталған, сабақтас салалардың дамуына ықпал етеді және ЖІӨ-нің шамамен 10%-ын қамтамасыз етеді, – деді ғалым. – Сондықтан Қазақстанның тау-кен металлургия секторындағы кадр тапшылығы – біздің индустриялық дамуымызды тежеп отырған аса өзекті мәселе. Қазіргі таңда металлургтер – өте сирек кездесетін дара мамандық иелері, ал бүгінгі олимпиада металлургтер мерекесіне айналып, кәсіби қауымдастық қалыптастыруға және осы дәстүрді келер ұрпаққа табыстауға ықпал етіп отыр».

Олимпиаданың қорытындысы бойынша командалық есепте Д. Серікбаев атындағы Шығыс Қазақстан техникалық университеті жеңімпаз атанды. Жеке есепте жеңімпаздар қатарында Григорий Ляпунов (Д. Серікбаев атындағы ШҚТУ), Данияр Ақанов (Қ. Жұбанов атындағы АРУ), Изетхан Сабитхан (М. Әуезов атындағы ОҚУ), Азамат Аманжолов (Торайғыров университеті), Айсымбат Көпбосын (Абылқас Сағынов атындағы ҚТУ), сондай-ақ Нұрдәулет Асылбеков (ҚИУ) бар. Олар өздерінің жоғары дайындық деңгейлері мен кәсіби дағдыларын көрсете білді. Жиын соңында жеңімпаздар мен жүлдегерлерді марапаттау рәсімі болды.

Олимпиаданың өткізілуі Сәтбаев университетінің инженерлік кадрларды даярлау мен тау-кен металлургия саласындағы ғылыми ынтымақтастықты дамытудағы негізгі алаң ретіндегі рөлін тағы да дәлелдеді. Мұндай бастамалар университет пен өнеркәсіп арасындағы байланысты нығайтып, кадрлық резервті қалыптастыруға ықпал етеді, осылайша Қазақстан экономикасының тұрақты дамуына үлес қосады. Бұл өз кезегінде стратегиялық маңызы бар салаға білікті кәсіби мамандардың келуін қамтамасыз етіп, сапалы білім беру, индустрияландыру және инновациялар сияқты тұрақты даму мақсаттарына қолдау көрсетеді.