Естелік пен сабақтастық: Сәтбаев университетінде Отан қорғаушылар күні мен Жеңіс күні атап өтілді

Сәтбаев университетінің Әскери іс институтында Отан қорғаушылар күні мен Жеңіс күніне орай «Мәңгілік алауға» гүл шоқтарын қою рәсімі өтті. Іс-шараға университет ректоры Мейрам Бегентаев, Қазақстанның еңбек сіңірген қайраткері, Ақсақалдар алқасының төрағасы, профессор Ұлықпан Сыдыков, сондай-ақ институттың бұрынғы басшыларының бірі, ҚР Қорғаныс министрінің бірінші орынбасары – Бас штабтың экс-бастығы генерал-лейтенант Булат Дарбеков қатысты. Олар жиналғандарды кәсіби мерекемен құттықтап, соғыс құрбандарын еске алды.

Бағдарламада ардагерлердің естеліктеріне ерекше орын берілді. Кафедраның еңбек сіңірген ардагерлерінің бірі, кафедраға 1984 жылы қызметке келген полковник Николай Мамченко тәуелсіздіктің алғашқы жылдарында кафедраның қалыптасуы мен Әскери іс институтының сол уақыттан бергі жеткен жетістіктері туралы айтты:

«Мен кафедраға келген кезде мұнда артиллеристер мен минометшілер дайындалатын, кейін әскери мамандықтар тізімі кеңейе бастады. Алғашқы күннен бастап біз өз әскери тәжірибемізді жастарға беруге ұмтылдық және кафедрамызды елдегі жетекші орындардың біріне айналдыру үшін бар күшімізді салдық. Кафедра базасында әскери округтер қолбасшыларының орынбасарлары үшін далалық дайындық бойынша одақтық жиындар өткізілді. 90-жылдардың қиын кезеңіне қарамастан, біз кафедраны және оның жинақтаған тәжірибесін сақтап қала алдық. Сондықтан Қазақстан тәуелсіздік алған сәттен бастап бұл тәжірибені біз әрі қарай ұрпақтан-ұрпаққа жеткізуге мүмкіндік алдық. Бүгінде институт түлектері жауынгерлік атыстарда тамаша нәтиже көрсетіп, кейбір әскери оқу орындарының курсанттарынан да жоғары көрсеткіштерге қол жеткізуде. Олардың дайындығының деңгейі күмән тудырмайды».

Бүгінде Әскери іс институты тұрақты түрде дамып келеді. Жыл сайын мұнда 30 бағыт бойынша шамамен 900 әскери резерв маманы даярланады. Бағдарламалардың кеңеюі, оның ішінде сержанттық құрамды даярлау оқудың практикалық бағытын күшейтуге мүмкіндік берді. Институт түлектері жоғары нәтижелер көрсетіп, Қарулы күштердің әртүрлі бөлімдерінде табысты түрде қызмет атқаруда.

Осындай іс-шаралардың өткізілуі ұрпақтар сабақтастығының жалғасын, әскери қызметтің маңыздылығын және ел қауіпсіздігін қамтамасыз етуде білімнің рөлі маңызды екендігін көрсетеді. Сәтбаев университеті тарихи естелікті сақтап, жастарды патриотизмге тәрбиелеу мен болашақ мамандардың кәсіби құзыреттерін дамытуды өзінің негізгі міндеттері ретінде қарастырады. Оның бәрі Қазақстанның қорғаныс қабілетін нығайтуға және еліміздің тұрақты дамуына бағытталған.