Халықаралық бейбітшілік пен сенім жылына орай Сәтбаев университетінде түрікмен студенттерімен кездесу өтті

Сәтбаев университетінде түрікмен студенттерімен кездесу өтті, бұл іс-шара Халықаралық бейбітшілік пен сенім жылына, сондай-ақ Түрікменстанның Бейтараптығының 30 жылдық мерейтойына арналды. Түрікмен делегациясын Қазақстан Республикасындағы Түрікменстан Елшілігінің кеңесшісі Нурымырат Розыджумаев бастап келді. Ол университет студенттері алдында сөз сөйлеп, мәдениетаралық диалогтың маңыздылығын және тату-тәтті көршілік қатынастарды дамытуда жастардың рөлі зор екенін атап өтті.

Аталмыш іс-шара Қазақстан мен Түрікменстан жастары арасындағы достықты нығайтудың маңызды алаңына айналды. Ал түрікмен студенттерінің көрсеткен өнері кездесудің шығармашылық атмосферасын толықтырды: олар өлең оқып, ұлттық әндер орындады және дәстүрлі «Куштдепди» биін биледі. Кездесу соңында студенттік қауымдастықтың дамуына қосқан зор үлестері үшін белсенді студенттерге ректордың атынан алғыс хаттар табыс етілді. Бұл жиын өзара мәдени алмасудың және елдер арасындағы байланыстарды нығайтудың жарқын үлгісіне айналып, Сәтбаев университеті халықаралық ынтымақтастық қарым-қатынасқа әрдайым ашық екендігін көрсетті.