Мультипанк-ғаламдарды жасау үшін Сәтбаев университетінде Game Jam 2025 басталып, оған ойын әзірлеушілер жиналды

Сәтбаев университетінде PUNKVERSE Game Jam SU 2025 фестивалі төртінші рет өтіп, оған ондаған команда жиналды. Олар 48 сағат ішінде киберпанк, стимпанк, дизельпанк және биопанк тоғысындағы ойындарды жасады. Бұл іс-шара ойын әзірлеу саласындағы инноваторлар үшін Орталық Азиядағы ең ірі фестивальға айналып, Қазақстанның креативті индустриялардың өсу орталығы ретіндегі позициясын нығайтты.

Фестивальдың ашылу салтанатында сөйлеген сөзінде Сәтбаев университетінің ректоры Мейрам Бегентаев жас әзірлеушілер үшін университет кеңістігінің маңызды екенін атап өтті:

«Game Jam — бұл еркіндік аймағы. Біз мұнда шығармашылыққа ешқандай шектеу болмағанын қалаймыз. Сіздер шынымен де мықтысыздар, ал ойын технологияларының болашағын дәл сіздер құрып отырғандарыңызға мен өте қуаныштымын. Біз мұнда төртінші рет жиналып отырмыз, әр жыл сайын сіздер өз қабілеттеріңіз бұдан да жоғары екенін дәлелдейсіздер», — деді қатысушыларға ректор.

Аталмыш фестиваль университетті толық шығармашылық кеңістікке айналдырды. Командалар күн-түн демей жұмыс істеп, жанданған технологиялар, антиутопиялық әлемдер мен постапокалипті мотивтер жаңа ойын механикасына қалай айнала алатынын зерттеді. Ұйымдастырушылар қатысушылар алдына қиын тапсырма қойды: шектеулі 48 сағат ішінде қалыптан тыс жобалар жасап, көптеген тың идеялар көрсету — хардкорлық механикалық әлемдерден бастап, болашақтың органикалық биожүйелеріне дейін жасау міндетін қойды.

Қазылар алқасының төрайымы, осы индустрияда танымал гейм-дизайнер және Fortnite, World of Warcraft пен Devil May Cry 5 жобаларына үлес қосқан ойын әзірлеуші Елизавета Морозова қатысушыларға фестиваль беретін мүмкіндіктердің құндылығы мен бұл жолдың күрделілігі туралы мотивациялық сөздерін айтты:

«Мен осымен айналысуды бастаған кезде мұндай курстар да, индустрия да, тіпті тәлімгерлер де болмады. Бәрін өзім үйренуіме тура келді. Ал қазір сіздерде бүгін жабдықтар, білімдеріңіз бар, қауымдастықтар мен сіздерге көмектесуге дайын адамдар бар. Осы мүмкіндікті пайдаланыңыздар. «Гейм джем» фестивальдары сіздердің деңгейлеріңізді өте қатты көтереді — бұл нағыз күш сынасу», — деп атап өтті ол.

Осы сөздерден шабыт алған командалар өз ойындарын нақты уақытта жасауға кірісті. «Джемнің» кульминациясы — командалар өз жобаларын фестиваль сарапшылары мен серіктестеріне таныстыратын питч-сессиялар сериясы болмақ. Ең үздік жобалар ірі жүлделерге ие болады: жеңімпаз командаға – 1 миллион теңге, сондай-ақ серіктестер мен демеушілерден қосымша марапаттар, жалпы қоры 3 миллион теңгені құрайтын сыйлықтар табысталады.

PUNKVERSE Game Jam SU 2025 фестивалі ҚР Ғылым және жоғары білім министрлігі мен индустриялық серіктестердің қолдауымен өтуде. Бұл шара Сәтбаев университетінің Орталық Азиядағы жетекші техникалық хаб ретіндегі позициясын одан әрі нығайтып, шығармашыл жастарға жаңа тың идеялар мен болашақ коммерциялық ойын жобалары туындайтын алаң ұсынады.