Сертификаттар тапсыру және Орталық Азия аккредиттелген білім беру бағдарламаларының тізіміне енгізу

Орталық Азия білім беруді аккредиттеу қауымдастығы (CAAAE) халықаралық аккредиттеуден сәтті өткені үшін аймақтағы жетекші университеттердің білім беру бағдарламаларына сертификаттар тапсыру рәсімін өткізді. Оның негізгі қатысушылардың бірі – Қазақстанда техникалық білім берудің флагманы – Қ.И.Сәтбаев атындағы Қазақ ұлттық техникалық зерттеу университеті болды. Университеттің білім беру бағдарламалары Ортаазиялық аккредиттелген білім беру бағдарламаларының тізіміне ресми түрде енгізілді, сөйтіп аймақтық және халықаралық бірыңғай сапа стандарттарына сәйкестігін растады.

Бұл тізімді құру Орталық Азия елдерінің білім беру саласындағы интеграциялық үдерістердің заңды жалғасы болып табылады. 2015 жылы Худжанд келісіміне қол қойылды, соның аясында Қазақстан, Өзбекстан, Қырғызстан және Тәжікстан жоғары білім берудің бірыңғай стандарттарын әзірлеп, енгізу туралы келісім жасаған болатын.

Содан кейінгі кезең – 2023 жылғы желтоқсан айында Алматы келісіміне қол қою болды, оның негізінде Орталық Азия білім беру сапасын қамтамасыз ету федерациясы (CAFEQA) құрылды және еуропалық мәліметтер базасымен (EQAR, DEQAR) синхрондалған, әрі беделді халықаралық ұйымдар (ENQA, ENAEE және т.б.) қолдау көрсететін Орталық Азия тізімі бекітілді.

Білім беру сапасы саласындағы халықаралық қауымдастықтардың толыққанды мүшесі ретінде СAAAE аймақтағы университеттердің академиялық беделін нығайту, кәсіби біліктіліктердің халықаралық мойындалуын қамтамасыз ету және академиялық ұтқырлықты кеңейту жөніндегі жұмыстарын белсенді түрде жалғастыруда.