Алгоритмдер жарысы: Сәтбаев университетінің студенттері жасанды интеллект негізінде автономды болидтер жасады

Сәтбаев университетінде  Machine Learning (машиналық оқыту) курсы ерекше әрі әсерлі финалмен аяқталды. Дәстүрлі емтиханның орнына бакалавр және магистратура студенттері өздері жасаған жобаларын виртуалды жарыс трассасына шығарды.

Курстың соңғы, жетінші зертханалық жұмысында болашақ инженерлердің алдына күрделі де қызықты міндет қойылды: автокөлікті өздігінен басқара алатын нейрондық желі құрастыру және оны үйрету. Студенттер күшейтілген оқыту (Reinforcement Learning) әдістерін қолдана отырып, «нөлден» үйренетін агенттерді әзірледі. Бұл агенттер кеңістікті тек алдыңғы камералар арқылы бағдарлап, дәл Tesla мен Waymo сынды заманауи пилотсыз көліктер секілді әрекет етті.

Финал нағыз кибер-турнир форматында ұйымдастырылды. Дәріс залындағы үлкен экранда арнайы ойын ортасының симуляциясы көрсетіліп, студенттердің алгоритмдері нақты уақыт режимінде бір-бірімен жарысты.

Нейрондық желінің міндеті тек газды басу емес, визуалды ақпаратты талдау, кедергілер мен қарсыластардан қашу, әрі жеңіске жеткізетін оңтайлы шешім қабылдау болды. Аудиториядағы атмосфера киберспорт чемпионатын еске салды: студенттер көшбасшылар тақтасын (лидербордты) жіті бақылап, орындардың қалай өзгеріп жатқанын көріп отырды. Ең тиімді әрі «ақылды» алгоритм әзірлеген қатысушылар жоғары ұпай жинап, семестрлік қорытынды тапсырмадан үздік баға алды.

Бұл турнир – мазмұнды да қарқынды өткен семестрдің шарықтау шегі болды. Курс барысында Сәтбаев университетінің студенттері теориядан бастап күрделі практикалық міндеттерге дейінгі толық жолдан өтті:

• Компьютерлік көру (Computer Vision) технологияларын меңгерді;
• Роботтандырылған манипулятор-қолдарды бағдарламалап, оларды үйретуді үйренді;
• Физикалық симуляцияланған ортада агенттердің өзара әрекеттесу ерекшеліктерін терең түсінді.

Мұндай оқыту тәсілі студенттерге тек теорияны жаттап қана қоймай, нақты жобалармен, дайын портфолиомен және қазіргі индустрияда сұранысқа ие тәжірибелік дағдылармен университет қабырғасынан шығуға мүмкіндік береді.

Турнир жеңімпаздарын және курсқа қатысқан барлық студенттерді семестрдің сәтті аяқталуымен шын жүректен құттықтаймыз!