Талапкер
Студент
Түлек
Қызметкер
Курстар
Бизнес серіктес
Бүкпесіз қаржылық сауаттылық: Сәтбаев университеті қаржылық қауіпсіздікке қалай үйретеді
Сәтбаев университетінде қаржылық сауаттылық бойынша дәрістер өткізілді. Шараны Жобаларды басқару институты мамандандырылған серіктес агенттіктермен бірлесіп ұйымдастырды. Экономикалық тергеу қызметінің подполковнигі, Қаржы мониторингі агенттігінің Алматы қаласы бойынша Экономикалық тергеу департаментінің криминалистика бөлімінің бастығы Азамат Қалиев пен Қаржы нарығын реттеу және дамыту агенттігінің Әлеуметтік жобалар және қаржылық сауаттылықты арттыру департаментінің бас маманы Дмитрий Акмаев несиені дұрыс пайдалану және жеке бюджетті тиімді басқару жөнінде өз пікірлерімен бөлісті.
Қаржылық сауаттылық әсіресе Сәтбаев университетінің студенттері үшін өте маңызды, өйткені болашақ инженерлер мен кәсіпкерлер қымбат жобалармен және инвестициямен жұмыс істейтін болады. Жетекші сарапшылар қатысатын ашық сабақтар студенттерге кәсіби ортамен жақынырақ танысып, болашақ мансабына дайындалу үшін тамаша мүмкіндік болып табылады.
– Біз студенттерден мүмкіндігінше көп сұрақтар күтеміз», – деді Дмитрий Акмаев. – Базалық білім, әрине, өте маңызды, алайда университет ең алдымен қарым-қатынас жасауға және мәселенің оң шешімін табуға үйретеді. Егер де осы дағдыларды терең меңгеріп, үнемі үйрене отырып, жаңалықтарды білуге ынталы болсаңыз, маман ретінде құндылығыңызды еселеп арттыра түседі. Әрі сонымен бірге мол табыс та әкеледі.
Баяндамашылар қаржылық мониторингтің, экономикалық тергеулердің өзекті мәселелерін, сондай-ақ халықтың қаржылық сауаттылығын арттырудың маңыздылығы туралы өзекті тақырыптарды талқылады. Әсіресе экономикалық қауіпсіздік саласындағы заманауи сын-қатерлерге және қаржылық қылмыстармен күресудің тиімді әдістеріне ерекше назар аударылды.
– Қызмет барысында мен қаржы туралы білімнің жетіспеушілігі адамдарды көп қарыздарға батырып, құқықтық зардаптарға әкелетін жағдайларды бірнеше рет кездестірдім», – деп атап өтті Азамат Қалиев. – Қазіргі уақытта жастар интернет арқылы жеңіл ақша табу жолдарын белсенді түрде іздейді, осылайша заңды табыс көзін алаяқтық схемадан ажырата алмай жүреді. Сондықтан да қаржылық сауаттылық тек студенттер үшін ғана емес, еліміздегі барлық жастар үшін өте маңызды.
Осындай сауаттылық ашуға мүмкіндік беру үшін FinGramota.kz порталы құрылып, Қаржылық сауаттылық кабинеттері ашылды, мұнда студенттер кәсіби кеңестер алып, тренингтерге қатыса алады және экономика мен қаржы саласындағы нақты істерді зерттей алады. Сәтбаев Университеті студенттердің табысты болашағы үшін олардың сыни көзқарасы мен қаржылық санасын дамытуға көмектесетін осындай білім беру шараларын ұйымдастыруды жалғастырады.
