Дүниежүзілік Азаматтық қорғаныс күні аясында Сәтбаев университеті сейсмикалық жаттығулар өткізді

1 наурыз – Дүниежүзілік Азаматтық қорғаныс күніне арналып өткен сейсмикалық оқу-жаттығу барысында Сәтбаев университетінің студенттері мен қызметкерлері жер сілкінісі кезіндегі іс-әрекеттерді, ғимараттардан эвакуациялау және алғашқы медициналық көмек көрсету жмыстарын жаттықтырды.

Университеттің Медициналық орталығының бас дәрігері «Гоша» атты манекенде адам өкпесін жасанды түрде желдету және жүрекке жанама массаж жасау техникасын көрсетті. Қатысушылар төтенше жағдайларда шұғыл көмек көрсету жұмыстары бойынша терең білім алды.

Студенттердің адамдарды құтқару әдістері туралы білім деңгейін арттыру мақсатында Бостандық ауданы ТЖБ-мен бірлесіп, апаттық-құтқару техникасының көрмесі ұйымдастырылды. Студенттер құтқару жұмыстарында қолданылатын «Магирус» және «Автобаспалдақ» атты арнайы машиналардың жұмысымен танысты.

Дүниежүзілік Азаматтық қорғаныс күні – Қазақстан үшін өте маңызды күн. Бұл әлемнің көптеген елдерінде атап өтіледі: бұл өрт сөндірушілер мен төтенше жағдайлар кезінде адамдарды құтқаратын, әрі техногендік және табиғи апаттар кезінде халыққа өзін қалай ұстау керектігін үйрететін құтқарушылар күні.

Сәтбаев университетінде осындай жаттығу сабақтарын өткізу студенттер мен қызметкерлерді болуы мүмкін төтенше жағдайларға дайындаудың маңыздылығын көрсетеді. Университет әрбір адамның өмірі мен денсаулығын қорғауға және қауіпсіздік мәселелеріне жауапкершілікпен қарау ісін дамытуға ұмтылады.