Экологиямен үнемі айналысу керек: Сәтбаев университетінде студенттік Экохаб ашылды

«Таза Қазақстан» бағдарламасы аясында Алматы қаласындағы Сәтбаев университетінің базасында алғашқы Экохаб (Экоорталық) іске қосылды. Бұл жоба студенттерді тұрмыстық қалдықтарды бөлек жинауға үйретуге және экологиялық мәдениетті қалыптастыруға бағытталған.

Экохаб – студенттер қажетсіз қалдықтарды жинап, одан пайдалы заттар жасау үшін пластикті қайта өңдеп шығаратын инновациялық өндіріс. Онда пластиктен орындықтар, зергерлік бұйымдар мен жануарлардың мүсіндері жасалады. Оның өндірісіне жасыл энергия пайдаланылады: студенттер бір мезгілде велотренажерда жаттыға алады, сөйтіп пластикті ұнтақтайтын ұсақтағыштарға қуат өндіре алады.

Жобаның негізін қалаушы Евгений Мұхамеджанов табиғатқа ұқыптылықпен қарау мәдениеті көзге көрінбейтін, бірақ іштей сезуге болатын процесс екенін, ал студенттер қоғамдағы экологиялық өзгерістердің қозғаушы күшіне айналатынын баса айтты. Алдағы жоспар – басқа қалалардағы оқу орындарында осындай экохаб ашу.

– Біз оқу орталығын, нағыз экохаб құруды жоспарлап отырмыз, – деді Евгений Мұхамеджанов өз сөзінде. – Бұл университетте оқитын немесе осында жақын жерде тұратын әрбір адам үшін тұрмыстық қалдықтарды әкеліп, оны қайта өңдеуге қатысуға мүмкіндік береді.

Осы мақсатта орталықта «Жасыл университет» бағдарламасы құрылып, оның аясында шеберлік сабақтары өткізілетін болады, онда гринвошинг мәселесі туралы айтылады. Болашақта барлық әзірлемелерді біріктіріп, қаланы аралайтын экотрак жасау жоспарлануда.

Аталмыш жоба экологиялық мәдениетті дамытудағы маңызды қадам болмақ және басқа университеттерді бағдарламаға қатысуға өтінім беруге тарта отырып, оның мүмкіндіктерін кеңейтуді жалғастыруда.