«Елдің болашағы – жастардың қолында»: алматылық жастар жаңа Конституцияны талқылау үшін Сәтбаев университетінде бас қосты

Сәтбаев университетінде Алматының әртүрлі жоғары оқу орындарынан келген белсенді жастар жиналып, «Референдум: жастардың ұстанымы» атты кездесу өткізді. Іс-шараға Қазақстан Республикасы Ғылым және жоғары білім министрлігі Жоғары және жоғары оқу орнынан кейінгі білім беру комитеті төрағасының орынбасары Акерке Абылайхан қатысты. Кездесу барысында еліміздің қоғамдық-саяси үдерісіндегі жастар рөлі және елдің мемлекеттілігі мен тәуелсіздігінің негізі ретінде Конституцияның маңыздылығы талқыланды.

Кездесудің модераторы Алматы қаласының студенттік омбудсмені, Алматы студенттер альянсының төрағасы Айболат Сембиев болды. Ол осындай ашық диалогтың маңыздылығын және жастардың қоғамдық маңызы бар бастамаларды талқылауға белсенді қатысуының қажеттілігін атап өтті. Сондай-ақ Алматы студенттерінің көшбасшылары студенттер алдында TEDx форматында сөз сөйлеп, елдің болашағын қалай елестететіндері және жаңа Конституцияның бұл үдерістегі маңызы туралы өз пікірлерімен бөлісті.

Кездесу соңында Акерке Абылайхан қорытынды сөз сөйлеп, студенттерді алдағы референдумға саналы түрде қарауға, әрі оған белсенді қатысуға шақырды. Конституция – Қазақстанның тәуелсіздігі мен тұрақтылығының іргетасы екенін атап өтіп, еліміздің гүлденуі үшін «Заң мен тәртіп», «Толық адам» және «Жаңа Қазақстан» секілді маңызды қағидаттар мен бастамаларды нығайтуда жастардың рөлі айрықша екенін баса айтты:

«Бүгінде дәл сіздер, жастар – ел болашағы үшін жауапкершілік жүгін арқалайтын басты күшсіздер. Конституция – жай ғана құжат емес, ол біздің тәуелсіздігіміздің, мемлекеттілігіміздің және бірлігіміздің берік негізі. Осы құндылықтарды сақтау және нығайту – сіздердің қолдарыңызда. Заң мен тәртіп әрқайсыңыздың ішкі таңдауларыңызға айналуы тиіс», – деді ол.

Кездесу белсенді жастарды марапаттау рәсімімен қорытындыланды: жастар бастамаларын дамытуға және қоғамдық өмірге белсенді араласқаны үшін университет студенттеріне Қазақстан Республикасы Ғылым және жоғары білім министрі Саясат Нұрбек атынан алғыс хаттар табыс етілді.

Сәтбаев университеті еліміздің алғашқы техникалық университеті әрі өңірдегі жетекші ғылыми-білім беру орталықтарының бірі ретінде дәстүрлі түрде мемлекеттік органдар мен студенттік қауымдастық арасындағы ашық диалог алаңы болып келеді. Мұндай кездесулер жастар мен мемлекеттік институттар арасындағы байланысты нығайтуға, саналы азаматтық ұстанымды қалыптастыруға және студенттердің көшбасшылық қабілеттерін дамытуға ықпал етеді.