Интеллектуалдық шайқас: Сәтбаев университеті 2025 жылғы «Жас Сәтбаев» байқауының жеңімпаздарын анықтады

Сәтбаев университетінде төртінші «Жас Сәтбаев» интеллектуалды сайысы өтті, онда Қазақстанның түкпір-түкпірінен жоғары сыныптардың дарынды оқушылары бас қосты. Байқаудың ақтық кезеңі университет қабырғасында өтіп, оған 600-ден астам өтінімнің арасынан іріктеліп алынған үздік он қатысушы келді. Ақтөбе облысы Мәртөк ауылынан келген Райхан Ещанова үздіктердің үздігі атанып, Сәтбаев университетінде оқу үшін ректор грантына ие болды.

Биылғы ақтық сайыста оқушылар Қазақстан тарихы мен Қаныш Сәтбаевтың өміріне қатысты сұрақтарға жауап беріп қана қоймай, нақты ғылыми жобаға байланысты тәжірибе жүргізді. «Химиялық және биохимиялық инженерия» кафедрасының профессоры Гүлзат Айтқалиева оқушылар металлургия өндірісінің қалдықтарына талдау жасағанын айтты:

– Биылғы ақтық кезеңнің тапсырмасы – өндіріс қалдықтарын талдау болды, – деді ол. – Біз өндіріс қалдықтарын қайта өңдеп, оны басқа салаларда пайдалануға болатынын оқушыларға көрсеттік. Бұл жеңімпаздарға өз дағдыларын көрсетіп қана қоймай, тұрақты даму технологияларының қалай жұмыс істейтінін жақсы түсінуге де мүмкіндік берді.

Биыл ұйымдастырушыларға Қазақстан қалаларынан ғана емес, ауыл-аймақтардан да өтінімдер келіп түсті. Бірінші және екінші кезеңдер онлайн форматта өтті, оның әрқайсысы физика, химия және математика пәндері бойынша 60 сұрақтан тұрады. Бұл сынақтардан сүрінбей өткен қатысушылар финалда кездесті. Оқушылар каникул кезінде уақыттарын тиімді өткізіп, бар күштерін салып, жоғары деңгейдегі білімдерін көрсетті.

– Оқушылар үшін бұл өте маңызды, – деп бөлісті өз ойымен Гүлзат Сляшевна. – Біз олардың қалай талпынып жатқандарын, қалай дайындалғандарын көріп отырмыз. Бұл бізді, ұйымдастырушыларды да ынталандырады. Мен әр кезде барлық қатысушылар үшін алаңдаймын және олар дұрыс жауап беріп, өз білімдерін көрсете алады деп сенемін.

Ал жеңімпаз үшін бас жүлде – Сәтбаев университетінде бакалавриат бойынша тегін білім беру гранты болды. Екінші және үшінші орындарға ие болған Қонаев қаласынан келген Сымбат Бақыт пен қарағандылық Бекзат Нұрболатұлы бағалы сыйлықтарға ие болды. Ұйымдастырушылар бұл байқауға қатысу балаларға болашақта үлкен жетістікке жетуге және еліміздің техникалық элитасы қатарында болуға көмектесетініне сенім білдірді.

«Жас Сәтбаев» байқауы осымен төртінші жыл қатарынан өткізілуде, осы уақыт аралығында оған жүздеген оқушылар қатысты, көпшілігі кейін еңбек жолын техникалық ғылымдармен байланыстырып, Сәтбаев университетіне оқуға түсті.