Қазақстанда әлемдік деңгейдегі дипломға ие болыңыз: Сәтбаев университетінде Study in Kazakhstan көрмесі өтті

Қазақстан жастардың халықаралық білім алуы үшін мүмкіндіктер жасауды жалғастыруда. Талапкерлерді Қазақстаннан шықпай-ақ шетелдік ЖОО-ның дипломын алу мүмкіндігімен таныстыру мақсатында ҚР Ғылым және жоғары білім министрлігі өзінің көптеген серіктестерімен бірлесіп, шетелдік жоғары оқу орындарының филиалдары бар қазақстандық жоғары оқу орындарының көрмелерін ұйымдастырды.

Осындай көрме Алматыда Сәтбаев университетінде өтті, өйткені ол инновациялық техникалық университет болып табылады және өз студенттеріне The Pennsylvania State University, City University of Hong Kong, University of Glasgow және басқа да шетелдік университеттердің дипломын алуға мүмкіндік береді. Қазірдің өзінде алғашқы студенттер осы шетелдік университеттерде қос диплом бағдарламасы бойынша оқуларын бастады.

Алматы қаласының 10 және 11-сынып оқушылары үшін ұйымдастырылған Study in Kazakstan көрмесіне Қазақстанның түкпір-түкпірінен 20 жоғары оқу орны қатысты. Оқушылар қос дипломдық бағдарламалар туралы мағлұмат алып, өздерін қызықтыратын сұрақтарды университет өкілдеріне тікелей қоюға мүмкіндік алды, тіпті алдағы өмірде қандай мамандық түрін таңдау керектігін түсіну үшін кәсіптік бағдарлау жөнінде тест тапсырды. Сондай-ақ көрмені Ғылым және жоғары білім министрінің кеңесшісі Руслан Емелбаев тамашалап, көрме бағдарламасы туралы айтып берді және барлық сұрақтарға жауап берді:

– Мұнда IT және жасанды интеллект саласындағы жетекші университеттердің бірі – Оңтүстік Кореяның Seul Tech университеті және американдық Аризона мемлекеттік университеті секілді жоғары оқу орындары ұсынылып отыр, – деді ол. – Бұл тек Алматы қаласының түлектері үшін ғана емес, қазақстандық жоғары оқу орнында тегін білім алып, екі диплом: бірі қазақ, екіншісі халықаралық стандарт бойынша шетел университетінің дипломын алғысы келетін талапкерлердің барлығы үшін тамаша мүмкіндік.

Study in Kazakstan көрмесі Мемлекет басшысының тапсырмасы бойынша Қазақстанда жүзеге асырылып жатқан қазақстандық студенттердің білім алу мүмкіндіктерін кеңейтуге және әлемдік еңбек нарығындағы бәсекеге қабілеттілігін арттыруға ықпал етеді. Қазірдің өзінде еліміздің көптеген өңірлерінде шетелдік жетекші жоғары оқу орындарымен байланыс орнатылып, қос диплом жүйесі бойынша білім алуға жағдай жасалған. Алдағы уақытта шетелдік жоғары оқу орындары филиалдарының саны артады деп күтілуде, сөйтіп қазақстандық студенттер оларға ҰБТ қорытындысы бойынша жалпы негізде оқуға түсе алады.