Мониторингтің бірінші күнінде Академиялық адалдық лигасы Сәтбаев Университетіне жоғары баға берді

Академиялық адалдық лигасының мониторингтік тобы Қазақстанның Сәтбаев Университетіне келіп, университеттің корпоративтік даму саласына, академиялық саласына, әкімшілік, әлеуметтік және білім беру салаларындағы жұмысына баға берді. Қонақтарға жаңартылған университет қалашығы ішіне экскурсия ұйымдастырылып, университеттің материалдық-техникалық базасы және студенттердің оқу атмосферасы мен ғалымдардың жұмысы толық көрсетілді.

Мониторинг тобы университет басшылығымен, институт директорларымен және Сәтбаев Университетінің құрылымдық бөлімшелері басшыларымен кездесіп, оларға университетте академиялық адалдық қағидаттарын жүзеге асыруға қатысты өзекті сұрақтар қойды. Мониторинг тобы университеттің зертханалық базасымен және ғылыми орталықтарымен танысты. Ғылыми зерттеулерге берілген гранттарды пайдаланудың ашықтығы мен ғылыми зерттеулердегі адалдық қағидаттарының сақталуын бақылауға баса назар аударылды.

Кездесу мен экскурсия жылы достық қарым-қатынаста өтті, комиссия мүшелері университеттің даму динамикасы жақсы екенін ерекше атап өтті.  Осылайша мониторинг тобының алғашқы жұмыс күні аяқталды, ол тағы да екі күнге созылады. Мониторинг тобы енді университеттің цифрландыру дәрежесін, студенттердің жатақханаға орналасуын, Әскери іс институтының оқу үдерісін зерттеп, Академиялық адалдық лигасының өкілдері профессорлармен, студенттермен, жұмыс берушілермен және түлектермен бірқатар кездесулер өткізеді.

Академиялық адалдық лигасы Қазақстандағы адал және сапалы білім беру миссиясын алға қарай дамыту жолында өз жұмысын жалғастыруда. Ол үшін Лига мүшелері университеттер мен олардың білім беру үдерістерінің Лига стандартының 105 критерийіне сәйкестігін тексереді. Өткен жылы Сәтбаев Университеті Лига рейтингінде 20-орында болды, ал биылғы көрсеткіш одан да жоғары болады деп күтілуде.