Ортаазиялық ғылыми хаб құру: Сәтбаев Университеті Horizon Europe Қазақстан тақырыптық үйлестірушілер байқауында жеңіске жетті

Сәтбаев Университеті тақырыптық үйлестірушілерге арналған халықаралық байқауда жеңіске жетіп, Еуропалық одақтың ғылым және инновациялар жөніндегі Horizon Europe шеңберлік бағдарламасының Қазақстандағы ұлттық үйлестірушісі атанды. Ал Marie Sklodowska-Curie Actions (Horizon Europe) бағыты бойынша ұлттық байланыс тұлғасы ретінде Энергетика және машина жасау институтының қауымдастырылған профессоры Бекен Арымбеков атанды.

Horizon Europe (Еуропа көкжиегі) – Еуропалық одақтың зерттеулер мен инновациялық қаржыландыру жөніндегі 2021–2027 жылдарға арналған ең ірі бағдарламасы. Бағдарламаның жалпы бюджеті 95,5 млрд еуроны құрайды, бұл оның ғылыми-зерттеу және дамыту саласында әлемдегі ең ірі бастамалардың бірі болуына септігін тигізеді. Бағдарлама тақырыптық кластерлер қағидаты бойынша ұйымдастырылған, ол денсаулық сақтау, энергетика, климаттың өзгеруі, тұрақты даму, цифрландыру және қауіпсіздіктің негізгі зерттелетін бастамалалық бағыттарын қамтиды. Marie Sklodowska-Curie Actions кластері докторлық және постдокторлық бағдарламаларды дамытуға, сондай-ақ жас ғалымдардың инновациялық жобаларын қаржыландыруға бағытталған.

Сәтбаев Университеті осы бағдарламаның Қазақстан мен Орталық Азиядағы үйлестірушісі және консультациялық ғылыми орталығы болады. Өз жұмысы аясында университет ғалымдарға кеңес беріп, зерттеу жобаларына серіктестер мен қаржыландыру жолдарын іздестіруге көмектеседі, сондай-ақ Қазақстандағы Horizon Europe бағдарламасына құжат тапсыру жұмыстарын үйлестіреді. Бұл ортаазиялық ғалымдарға халықаралық қолдау көрсете отырып, университетті Орталық Азияның инновациялық хабына айналдыру жолындағы тағы бір қадам болмақ.

Қазақстандағы Marie Sklodowska-Curie Actions (Horizon Europe) бағдарламасына қатысу бойынша мына мекенжайға хабарласуға болады:

Бекен Арымбеков, b.arymbekov@saybayev.university