SIOMMS-2025 Дүниежүзілік студенттік олимпиадасы Сәтбаев университетінде

Сәтбаев университетіне әлемнің түкпір-түкпірінен келген студенттер жиналды, мұнда механизмдер мен машиналар теориясы және роботтар механикасы саласы бойынша 6-шы Дүниежүзілік студенттік олимпиада – SIOMMS-2025 басталды. Олимпиада IFToMM халықаралық федерациясының қолдауымен өтіп, 28 қарашаға дейін жалғасады.

Олимпиаданы ашу барысында модератор, академик Амандық Тулешов ғылым және жоғары білім министрі Саясат Нұрбек SIOMMS-2025 олимпиадасын қолдап, студенттер мен барлық қатысушыларға құттықтау хат жолдағанын атап өтті. Сәтбаев университетінің әкімшілік, әлеуметтік және тәрбие жұмысы жөніндегі проректоры Сапар Шалабаев барлық қатысушылар үшін біздің университет екінші үйге айналады деген үмітін білдірді:

– Осы олимпиаданың біздің университетте өтуі – біз үшін үлкен мәртебе. Әлемнің түкпір-түкпірінен келген студенттер жаңа жобалар жасап, инженерлік ғылымда шығармашылық танытып жатқанын көру – біз үшін үлкен қуаныш, – деді проректор.

Олимпиада бағдарламасы механизмдер мен робототехника бойынша жарыс тапсырмаларын, Сәтбаев университетінің ғылыми зертханаларына экскурсия жасауды және IFToMM Kazakhstan жетекші мамандарынан арнайы дәрістер алуды қамтиды. Екі күн ішінде студенттер өз білімдерін көрсетіп қана қоймай, Қазақстанның алғашқы техникалық университетімен және автоматтандыру саласындағы соңғы жетістіктермен таныса алады.

Іс-шараның ұйымдастырушылары – IFToMM Kazakhstan, Сәтбаев университеті және академик Ө.А. Жолдасбеков атындағы Механика және машинатану институты, сондай-ақ оған Қазақстан Ұлттық инженерлік академиясы қолдау көрсетуде. Олимпиадаға Қытай, Испания, Румыния, Ресей, Қырғызстан және Қазақстаннан келген командалар қатысады. Қазақстан атынан үш университет – Сәтбаев университеті, әл-Фараби атындағы ҚазҰУ, Оңтүстік Қазақстан мемлекеттік университеті және Ө.А. Жолдасбеков атындағы Механика және машинатану институты қатысады.

IFToMM – ең ірі халықаралық инженерлік федерация, ол 45 елді біріктіреді. Бұл ұйым механизмдерді, роботтарды, автоматтандыру жүйелері бойынша ғылымды дамыту, инженерлік білім беруді ілгерілету және дүние жүзіндегі барлық жас мамандарды қолдау бағытында жұмыс істейді. SIOMMS-2025 олимпиадасының Алматыда өтуі Қазақстанның жаһандық ғылыми-техникалық күн тәртібіндегі рөлінің артып келе жатқанын айқындайды және Сәтбаев университетінің осы аймақтағы жетекші инженерлік білім орталықтарының бірі ретіндегі мәртебесін күшейтеді. Олимпиада студенттерге тәжірибе алмасуға, кәсіби байланыстар орнатуға және ғылыми идеяларын халықаралық деңгейде ұсынуға мүмкіндік береді.