Таза Қазақстан үшін: Сәтбаев университетінің студенттері университет қалашығында алманың аңызға айналған түрі – Сиверс көшеттерін отырғызды

Алматы қаласында «Таза Қазақстан» республикалық қозғалысы аясында Сәтбаев университетінің ұйымдастыруымен, әрі «Alma Qala» бастамасымен бірлескен экологиялық акция өтті. Университет студенттері мен оқытушылары төртінші жатақхана аумағына жиналып, қаланы көгалдандыруға және қоршаған ортаны абаттандыруға өз үлестерін қосты.

Іс-шараға қатысушылар Сиверс алмасының көшеттерін отырғызды. Алманың бұл түрі – барлық заманауи сорттардың жабайы атасы және Қазақстанның табиғи байлығының символы болып табылады. Сонымен қатар қатысушылар университет аумағында көктемгі тазалық жұмыстарын жүргізіп, экологиялық жағдайды жақсартуға және қалалық тұрақты ортаны қалыптастыру ісіне атсалысты.

Президент Қасым-Жомарт Тоқаевтың бастамасымен қолға алынған «Таза Қазақстан» акциясы халықтың экологиялық мәдениетін арттыруға және азаматтарды қоршаған ортаны қорғау мәселелеріне жұмылдыруға бағытталған. Бұл акция 2024 жылы іске қосылғалы бері оған миллиондаған қазақстандықтар қатысып, жаппай сенбіліктер өткізілді, мыңдаған ағаштар отырғызылып, қомақты көлемде қоқыстар жиналды. Бұл қозғалыстың бір бөлігі – «Alma Qala» бастамасы, оның аясында қала тұрғындары Алматы көшелеріне алма көшеттерін отырғызуда.

Сәтбаев Университетінің бұл бастамаға қатысуы университеттің тұрақты даму қағидаттарына және қоршаған орта жауапкершілігіне адал қарайтындығын білдіреді. Мұндай іс-шаралар қаланың экологиясын жақсартуға ғана емес, сонымен қатар жастардың бойында экологияға деген сана-сезімді арттыруға, табиғат пен қоршаған әлемге жауапкершілікпен қарауды қалыптастыруға ықпал етеді.