Сәтбаев университеті 2024 жылғы «ЖОО-ның Үздік оқытушысы» байқауының жеңімпаздарын құттықтайды

«ЖОО-ның Үздік оқытушысы–2024» байқауы жеңімпаздарының есімдері белгілі болды. Республикалық конкурстық комиссия мамандық бойынша үздіктердің арасынан ең үздіктерін таңдады.

Қазақстан Республикасы Ғылым және жоғары білім министрлігі жыл сайын жоғары білім беру мен ғылым жетістіктерін дамытуға қосқан зор үлесі үшін академиялық қауымдастық арасынан ең үздік өкілдерді марапаттайды.

Байқауға биылғы жылы еліміздің 90 жоғары оқу орнынан 946 үміткер қатысты. Комиссия білім беру сапасын, оқытушылардың кадр даярлау жөніндегі біліктілігін, оқу материалдарын, ғылыми басылымдарды әзірлеуді, ғылыми патенттерінің болуын және басқа да параметрлеріне баға берді. Осылайша, қазақстандық 43 жоғары оқу орнының 150 оқытушысы жеңімпаз атанды.

Ал Сәтбаев университетінің оқытушылары бұл байқауда да дәстүрлі түрде жоғары дәреже көрсетіп, өз мамандықтарына адалдықтарын танытты, сөйтіп жеңіске жетті. 2024 жылғы байқауға қатысу үшін университет атынан 12 өтінім берілсе, сол оқытушылардың барлығы жеңімпаздар қатарынан көрінді:

1. Қасым Елемесов – Энергетика және машина жасау институты «Технологиялық машиналар және жабдықтар» кафедрасының профессоры;
2. Маржан Нұрпейісова – Тау-кен металлургия институты «Маркшейдерлік іс және геодезия» кафедрасының профессоры;
3. Мадина Исаметова – Көлік инженериясы және логистика мектебі «Көлік инженериясы» кафедрасының профессоры;
4. Дархан Ережеп – Энергетика және машина жасау институты «Стандарттау, сертификаттау және метрология» кафедрасының профессоры;
5. Ерболат Абен – Тау-кен металлургия институты «Тау-кен ісі» кафедрасының профессоры;
6. Жанар Нармұратова – Геология және мұнай-газ ісі институты «Химиялық және биохимиялық инженерия» кафедрасының оқытушысы;
7. Сандуғаш Сандыбаева – Геология және мұнай-газ ісі институты «Химиялық және биохимиялық инженерия» кафедрасының оқытушысы;
8. Джамилям Исмаилова – Геология және мұнай-газ ісі институты «Мұнай инженериясы» кафедрасының профессоры;
9. Қырмызы Тайсариева – Автоматтандыру және ақпараттық технологиялар институты «Электроника, телекоммуникациялар және ғарыштық технологиялар» кафедрасының профессоры;
10.  Салтанат Бергалиева – Энергетика және машина жасау институты «Стандарттау, сертификаттау және метрология» кафедрасының профессоры;
11.  Қыдыр Асқарұлы – Энергетика және машина жасау институты «Жалпы физика» кафедрасының профессоры;
12.  Кеңес Құдайбергенов – Тау-кен металлургия институты «Материалтану, нанотехнологиялар және инженерлік физика» кафедрасының профессоры.

Сәтбаев университетінің тағы да үш өкілі «Үздік ғылыми қызметкер» атағына ие болды. Олар:

1. Қуаныш Тогизов,
2. Бұлбұл Онгар,
3. Алтынай Шарипова.

«ЖОО-ның Үздік оқытушысы» байқауы – оқытушылардың кәсіби еңбегін мойындау ғана емес, сонымен қатар еліміздің академиялық әлеуетін дамытуға бағытталған маңызды бастама. Сәтбаев университеті жеңімпаздарға алдағы уақытта жаңа табыс, жаңа ғылыми жаңалықтар мен саналы студенттер тілейді! Біз білімнің болашағын бірге жасаймыз!