Сәтбаев Университеті Bar-Ilan университетімен ынтымақтастық перспективалар туралы талқылады

Халықаралық қатынастарды дамыту аясында Сәтбаев Университетінің бірінші проректоры Израильдегі ең ірі университеттердің бірі – Bar-Ilan университетінің өкілдерімен кездесті. Израиль университетінің делегациясын университеттің бас директоры Захар Йинон бастап келіп, өз университетімен таныстырды және болашақ ынтымақтастық қарым-қатынастың әлеуетті мүмкіндіктері жайлы айтты.

Кездесу барысында студенттермен өзара алмасу мәселелеріне, қос дипломдық бағдарламаларды құруға және бірлескен ғылыми зерттеулер жүргізуге ерекше назар аударылды. Сондай-ақ Сәтбаев Университетінің магистранттары, докторанттары мен оқытушыларының шетелдік тағылымдамадан өту мүмкіндіктері жайлы талқыланды. Бұл бағдарлама қатысушыларына тәжірибе алмасуға және кәсіби дағдыларын кеңейтуге мүмкіндік береді.

Кездесу нәтижесінде кванттық инженерия, жасанды интеллект және жаңартылатын энергия көздері сияқты салалар бойынша бірлескен білім беру және ғылыми бағдарламаларды әзірлеу туралы шешім қабылданды. Сондай-ақ студенттермен өзара алмасу бағдарламаларын ұйымдастырудың егжей-тегжейлері, соның ішінде гранттық жобаларға қатысу мүмкіндіктері де талқыланды. Ынтымақтастық жұмыстарын одан әрі жоспарлау үшін онлайн кездесулер өткізу туралы шешім қабылданды.

Бар-Илан университеті (Bar-Ilan University) – Израильдің мемлекеттік жетекші зерттеу университеттерінің бірі, ол дәстүрлі құндылықтарды заманауи ғылыми жетістіктермен интеграциялауға ұмтылу ынтасымен танымал болып отыр. Университеттің негізгі ерекшеліктерінің бірі – оқытудың пәнаралық тәсілін қолдану, яғни студенттерде терең ғылыми зерттеулерді қазіргі заманның өзекті мәселелерін шешуге бағытталған практикалық жобалармен ұштастыруға мүмкіндік бар.