Сәтбаев университеті GIS Day Kazakhstan 2024 геокеңістіктік технологияларының жаңа көкжиектерін ашуда

Халықаралық геоақпараттық жүйелер күнін мерекелеу аясында Сәтбаев университетінде GIS Day Kazakhstan 2024 атты халықаралық конференция басталды, оған өз жұмысында географиялық ақпараттық жүйелерді пайдаланатын кәсіпқойлар, зерттеушілер мен кәсіпорын басшылары жиналды. Биылғы жылы конференция спикерлері экологиялық мәселелерді шешуге, қаланың тұрақты дамуына, жасанды интеллект пен әртүрлі салаларды цифрлық трансформациялауға ерекше назар аудара отырып, ГИС-технологияларын инновациялық қолдануды жариялауды одан әрі жалғастыруда.

Конференцияны академиялық мәселелер жөніндегі проректор Раиса Өскенбаева ашып, географиялық ақпараттық жүйелер барлық заманауи салаларда – мұнай, тау-кен өнеркәсібі, металлургия және деректерді талдау салаларында қолданылатынын, сөйтіп Қазақстанның бүкіл өнеркәсібінің ландшафтын өзгерте алатынын атап өтті. Ал Қаныш Сәтбаев атындағы университет бұл өзгерістерге салааралық ұжымдарды біріктіруде қашан да көшбасшы болып, шешуші рөл атқарады.

Конференция Сәтбаев университетіндегі Геоматика инновациялық орталығы қолдауының арқасында өтті және ол жетекші сарапшыларды, инноваторларды, жас мамандар мен осы саланың болашағы туралы шешім қабылдайтын мемлекеттік органдардың өкілдерін біріктірді. Конференцияны Геоматика инновациялық орталығының директоры Эльмира Орынбасарова, Анжелика Камза, Венера Жүнісбекова, Айнұр Ержанқызы, Ақмарал Тоқбергенова және Айнұр Рыщанова ұйымдастырды. Осы іс-шараны ұйымдастыруға зор үлес қосқан университет түлектерінің қатарында Ұлттық картографиялық-геодезиялық орталықтың директоры Алмас Кенбаев, «Гео-Алидада» компаниясының директоры Шыңғыс Садықов және тағы басқалар бар.

Конференция аясында бос жұмыс орындары жәрмеңкесі ұйымдастырылды – университет студенттері өздерінің өтінімдерін толтырып, конференцияның серіктес ұйымдарының бірінде бетпе-бет сұхбаттасудан өте алады, атап айтқанда: NurA-System, Geoken, Leica Geosystems, Data+International, GeoAlert, Softprom. Бұл компаниялардың көпшілігі университетке үнемі қолдау көрсетіп, түлектерді жұмыс орындарымен қамтамасыз етеді және оқу үдерісіне қолдау көрсетеді. Мысалы, Data+International компаниясы, конференциядан басқа, «Маркшейдерлік іс және геодезия» кафедрасына ArcGIS Pro жүйесінде жұмыс істеу үшін 50 лицензия табыс етті.

Қатысушылар мұндай конференциялар тәжірибе алмасуға ықпал етіп қана қоймай, бизнесті, өндіріс пен ғылымды біріктіретінін атап өтті.

– Осы конференция аясында тағы басқа жаңа жобалар дүниеге келеді деп күтеміз, өйткені геоақпараттық жүйелер барлық жерде қолданылатын бағдарламалық қамтамасыз ету», – деді О.Байқоңыров атындағы Тау-кен металлургия институтының директоры Қанай Рысбеков. – Мысалы, біз жақын арада «Тау-кен өндірісін автоматтандыруды модельдеу» зертханасын ашамыз – бұл жүйелер де сонда қолданылатын болады! Алдағы уақытта осындай мәселелерді тиімді шешу үшін, бүгін біз ортақ тіл табуға тырысамыз.

Конференцияның екінші күні карта конкурсына, торттар байқауына және практикалық шеберлік сабақтарына арналады, бұл барлық қызығушылық танытқан адамдарға географиялық ақпараттық жүйелерді тәжірибе жүзінде қолдануға мүмкіндік береді. Өткен жылдардағыдай, ұйымдастырушылар геокеңістіктік технологиялардың болашағын және олардың аймақтың өзекті мәселелерін шешудегі рөлін анықтайтын шеберлік сабақтары мен пікірталастарға қатысуға шақырады.