Сәтбаев университеті мен «Казселезащита» төтенше жағдайлардан қорғау жөніндегі ынтымақтастық бағдарламасын жаңартты

Сәтбаев университетінде ректор Мейрам Бегентаев және ҚР Төтенше жағдайлар министрлігі «Казселезащита» мемлекеттік мекемесінің делегациясы Ерболат Садырбаевтың басшылығымен жұмыс кездесуін өткізді. Екі жақ тараптар табиғи апаттардың алдын алу және оның зардаптарын жою саласы бойынша бірлескен ғылыми зерттеулер мен білім беру бағдарламаларын әзірлеуге бағытталған ынтымақтастық туралы меморандумға қол қойды.

Сәтбаев университеті мен «Казселезащита» мекемесі ұзақ жылдар бойы бірлесіп жұмыс істеп келеді. Белгілі болғандай, климаттың өзгеруі жер сілкінісі, су тасқыны, морена-мұздық көлдердің жарылуы сияқты табиғи қауіптердің ұлғаюына әкеледі. Адамдарға қауіп төндіретін апаттардың алдын алу мақсатында оларды күнібұрын есептеу міндетін университет пен төтенше жағдайлардың алдын алу орталығы көп жылдар бойы бірлесіп шешіп келеді. Енді осы ынтымақтастықты одан әрі кеңейту жоспарланып отыр.

Геология және мұнай-газ ісі институты директорының міндетін атқарушы Ерғали Әуелхан бұл жаңа меморандум ынтымақтастық туралы бағдарламаны айтарлықтай кеңейтіп, оған соңғы инновациялық әдістерді қолданатын жобаларды қосуға мүмкіндік береді деп атап өтті:

– Университет ретінде біздің ғылыми әлеуетіміз өте үлкен», – деді ол. – Бізде жерді қашықтықтан зондтауға арналған қондырғылар бар, біз жер бетіне георадарлық түсірілімдер жасап, геодезиялық зерттеулер жүргізе аламыз немесе ұшқышсыз ұшатын аппараттардың көмегімен карта сызып, сел ағындарының үлгісін және т.б. жасай аламыз.

Жаңа келісім ғылыми жобаларды бірлесіп жүзеге асыруды, студенттер мен арнайы мамандарды оқыту семинарларын өткізуді, сондай-ақ табиғи қауіп-қатерлерді бақылау мен ескертудің автоматтандырылған жүйесін дамытуды көздейді. Әсіресе Қазақстанның таулы аймақтары үшін өзекті болып табылатын сел, қар көшкіні және басқа да көшкіндердің алдын алу жөніндегі ғылыми-зерттеу жұмыстарымен қатар, жоғары білікті мамандарды даярлауға да ерекше көңіл бөлінетін болады.

Ерболат Садырбаев өз кезегінде табиғи апаттармен күресте ғылыми және білім беру серіктестіктерінің шешуші рөлін атап өтті:

– Университет бізге тамаша ғылыми және білім беру алаңын ұсынып отыр, – деді ол кездесуде. – Бұл, әрине, жаңа деңгей, жаңа үлес, жаңа жұмыс қарқыны, сондықтан да біз өз мақсатымызға жетеміз деп сенеміз.

Меморандумға қол қою еліміздің азаматтық қорғаныс және тұрақты даму саласындағы ғылыми және практикалық әлеуетін нығайту жолында жасалған маңызды қадам болмақ.