Сәтбаев университеті мен «Ұлттық сараптама және сертификаттау орталығы» метрология саласында жаңа білім беру экожүйесін құруда

«Ұлттық сараптама және сертификаттау орталығының» Алматы филиалы базасында Сәтбаев университетінің «Стандарттау, сертификаттау және метрология» кафедрасының филиалы ашылды. Бұл жоба «ҰСжСО»-ның қуатты инфрақұрылымын Сәтбаев университетінің ғылыми-зерттеу әлеуетімен біріктіріп, Қазақстанда заманауи білім беру және ғылыми экожүйесінің негізін қалайды.

Кафедраның салтанатты ашылу рәсіміне Сәтбаев университетінің ректоры М.М.Бегентаев пен «Ұлттық сараптама және сертификаттау орталығының» президенті Дамир Суентаев, сондай-ақ осы екі ұйымның басшылары, ғалымдары мен оқытушылары қатысты. Іс-шара аясында қонақтар «ҰСжСО»-ның тексеру, калибрлеу және сынақ жүргізу зертханаларын аралап, олардың мүмкіндіктерімен танысты, әрі алдағы ынтымақтастық қарым-қатынастың болашағы туралы талқылады.

Бұл білім беру экожүйесінде негізінен бірлескен зертханаларға ерекше көңіл бөлінеді. Олар нормативтік құжаттардың цифрлық дерекқорларын, білім беру бағдарламаларын және дуальды оқу форматтарын әзірлеу, сондай-ақ ғылыми зерттеулер мен қолданбалы жобаларды іске асыру базасы ретінде қызмет атқарады.

Орталықтың коммерция бөлімінің бастығы Темірлан Серіковтың айтуынша, ынтымақтастық қарым-қатынастың басты мақсаты – білім беру экожүйесін құру.

«Бірлескен білім беру бағдарламаларын, дуальды оқыту әдісін және түлектердің болашақ мансаптарын қолдау ғылым мен өндіріс арасындағы байланысты нығайтуға мүмкіндік береді. Егер мұндай экожүйе құрылса, біз кәсіби қауымдастық қалыптастыра аламыз», – деп атап өтті ол.
Бұл жоба Сәтбаев университеті мен «Ұлттық сараптама және сертификаттау орталығы» арасында бұған дейін қол қойылған ұзақ мерзімді ынтымақтастық туралы меморандум аясында белгіленген жұмыстардың бір бөлігі болып табылады. Болашақта бұл ынтымақтастық алдыңғы қатарлы жобаларды дамыту және инновациялық шешімдерді коммерцияландырумен айналысатын ғылыми-техникалық консорциум құруды қамтиды. Консорциум сонымен қатар студенттер мен қызметкерлердің кәсіби тұрғыда өсуін қолдай отырып, оларды өнеркәсіппен біріктіреді.

Кафедраның ашылу құрметіне орай «ҰСжСО» Алматы филиалының қызметкерлері Сәтбаев университетіне 1950 жылдары Ленинградтағы «Госметр» зауытында шығарылған бірегей механикалық таразыны сыйға тартты. Ол университеттегі технологиялар музейінің жәдігерлері арасында өзінің құрметті орнын алары сөзсіз. Бұл таразы 10 кг-ға дейінгі салмақтарды дәл өлшеуге мүмкіндік береді, ал оның бөліктері небәрі 1 мг құрайды. Өз дәуіріндегі инженерлік жетістіктің айқын мысалы саналатын бұл таразы метрологияның тарихи даму жолын бейнелейтін символға айналып отыр. Ал музей коллекциясында аналогтық телефондар, пленкалық фотоаппараттар мен басқа да тарихи маңызы бар технологиялық құралдар бар.

«Ұлттық сараптама және сертификаттау орталығының» Алматы филиалы Қазақстан мен ТМД елдері арасында метрология және сертификаттау бойынша жетекші орталықтардың бірі болып табылады. Орталықтың бірегей инфрақұрылымы мен жоғары білікті мамандары дәл өлшемдер жүргізу мен халықаралық деңгейдегі мамандарды даярлау үшін барлық жағдайды жасауда.

Орталық базасында «Стандарттау, сертификаттау және метрология» кафедрасының құрылуы ғылым, білім беру және өндірісті интеграциялау үшін жаңа мүмкіндіктер ашады. Бұл бастама Қазақстанның халықаралық аренадағы орнын нығайтады, жоғары білікті мамандардың жаңа буынын даярлауға және әртүрлі салаларда инновацияларды енгізуге жағдай жасайды.
Сәтбаев университеті мен «Ұлттық сараптама және сертификаттау орталығы» техникалық реттеу және метрология саласындағы еліміздің тұрақты дамуын қамтамасыз ететін білім беру және кәсіби ортаны қалыптастыру жолында маңызды қадам жасап отыр.