Сәтбаев Университеті мерейтойлық жылдың қорытындысын шығарып, алдағы жоспарларын белгіледі

Сәтбаев Университетінің ректоры Мейрам Бегентаев 2024 жылдың қорытындысын шығарды. Университет өз тарихының 90 жылдығын және академик Қаныш Сәтбаевтың 125 жылдығын атап өтіп, ауқымды іс-шаралар ұйымдастырды. Оқу орнының басшысы ұжымға жетістіктері үшін алғысын білдіріп, даму бағыттарын атап өтті. Олардың қатарында цифрлық трансформация, халықаралық ынтымақтастық және ғылыми зерттеулер бар.

2024 жылы Сәтбаев Университеті  Қазақстанның жетекші оқу орны мәртебесін растап, білім экономикасын қалыптастыруда және Орталық Азия академиялық хабының дамуына негіз болуда өз үлесін қосты. CityU, University of Glasgow, PennState және Sungkyunkwan University сияқты әлемдік жетекші жоғары оқу орындарымен серіктестік орнатып, ғылым мен инновациялық технологияларды дамытуда жаңа мүмкіндіктер ашты.

Университеттің басым бағыттарының бірі – студенттер мен оқытушылардың жаһандық тұрақты даму жобаларына қатысуы болды. Future 17 консорциумы аясында Сәтбаев Университетінің студенттері оқудың алғашқы жылдарынан бастап экологиялық және әлеуметтік тұрақтылықты жақсартуға бағытталған халықаралық бастамалармен айналысуда.

Ректор университеттің цифрлық трансформациясының маңыздылығын атап өтті. Polytech Online платформасы, дуалды оқыту жүйесі және заманауи оқыту әдістері студенттерге сапалы білім алуға мүмкіндік береді. Сондай-ақ, университет ғалымдары ғылыми жобалар, шаруашылық келісімшарттар мен стартаптар арқылы қаржы тартып, университеттің дамуына елеулі үлес қосты.

Айта кетейік, Университет өзінің ғылыми инфрақұрылымын кеңейте түсті. Биыл Түсті металлургия саласындағы инженерлік орталық, «Stroytech» технологиялық паркі және FabLab MIT зертханасы ашылды. Сондай-ақ, жаңа оқу корпустары мен 955 орындық жатақхананың құрылысы басталды.

Сәтбаев Университетінің басты мақсаттарының бірі – әлемнің үздік 200 университетінің қатарына ену. Бұл мақсатқа жету үшін университет ұжымы мен серіктестерінің бірлескен жұмысы қажет.

Іс-шара академик, геология-минералогия ғылымдарының докторы, Мемлекеттік сыйлықтың лауреаты Герой Жолтайұлына арналған салтанатты рәсіммен аяқталды. Өз сөзінде Герой Жолтайұлы университеттің бүгінгі таңда халықаралық деңгейде екенін және ғылым мен өндірісті біріктіру жаңа жетістіктерге жол ашатынын, бұл Қаныш Сәтбаевтың өсиеті болғанын атап өтті.

Сәтбаев Университеті  мерейтойлық жылды жақсы мақсаттармен аяқтап, студенттерді, оқытушыларды және ғалымдарды алға қарай ұмтылуға, Қазақстандағы ғылым мен білімнің дамуына үлес қосуға шабыттандырды.