Сәтбаев университетінде Тәуелсіздік күніне арналған концерт өтті

Ағымдағы жылы 10 желтоқсан күні Сәтбаев университетінде Қазақстан Республикасының Тәуелсіздік күніне арналған мерекелік концерт өтті. Концертке Алматы қаласы әкімінің Концерттік оркестрі қатысты, оркестрдің көркемдік жетекшісі – Қазақстанның халық артисі Мұрат Серкебаев.

Концерттік бағдарламаның репертуарында – Қазақстан және шетел композиторларының шығармалары мен классикалық музыка тыңдалды. Концерт басталмас бұрын Мұрат Серкебаев университет қызметкерлерін Тәуелсіздік күнімен және келе жатқан Жаңа жыл мерекесімен құттықтады. П.И. Чайковскийдің «Вальс цветов» шығармасы концерт шымылдығын ашты.

Алматы қаласы әкімінің Мұрат Серкебаев басқаратын Концерттік оркестрі тек қана Қазақстан емес, сондай-ақ алыс-жақын шетелдерге де таныс. Ол 1965 жылы құрылған. 1975 жылдан бастап Қазақстанның халық артисі Мұрат Серкебаев оған жетекшілік етіп келеді. Оркестрдің репертуары өте мол, ол қазақтың ұлттық әуендерімен қатар шетелдік композиторлардың да шығармаларын тамаша орындайды.