Сәтбаев Университетінде жастар арасында сыбайлас жемқорлыққа қарсы мәдениетті қалыптастыру жөнінде «Адал ұрпақ» жобасы бойынша семинар өтті

Сәтбаев Университетінің сыбайлас жемқорлыққа қарсы күрес қызметі «Адал ұрпақ» жобасы аясында студенттерге «Жастар арасында сыбайлас жемқорлыққа қарсы мәдениетті қалыптастыру» тақырыбында семинар ұйымдастырып, студенттердің назарын сыбайлас жемқорлықпен күрес мәселелеріне аударды.

Семинарға Алматы қаласындағы «Адалдық алаңы» жобалық кеңсесінің басшысы Марат Қалимолдин, қоғам қайраткері, «Ел бірлігі» одағының президенті Шолпан Ризабекова, сондай-ақ «Жаңару» қозғалысының белсендісі М.Ахметсафин қатысты. Мамандар сыбайлас жемқорлыққа қарсы күрестегі өз тәжірибелерімен бөлісіп, әлеуметтік белсенділік пен сыбайлас жемқорлыққа жастайынан төзбеудің маңыздылығын айтты.

Семинар 2-курс студенттеріне «Сыбайлас жемқорлыққа қарсы мәдениет пен құқықты қалыптастыру негіздері» атты оқу курсы аясында ұйымдастырылды. Қатысушылардың пікірінше, іс-шараның пайдалы және тәрбиелік мәні зор болды, әрі жастар арасында сыбайлас жемқорлық мәселесіне саналы және белсенді көзқарасты қалыптастыруға ықпал етті. Семинар барысында қатысушыларға сыбайлас жемқорлықпен күрес тақырыбында бейнероликтер көрсетіліп, мәселенің ауқымын тереңірек түсінуге көмектесті.

Ұйымдастырушылар мен қатысушылар жастар арасында сыбайлас жемқорлыққа төзбеушілікті қалыптастыру адал және әділ қоғам құру жолындағы маңызды қадам екенін атап өтті.