Сәтбаев университетіндегі маңызды басқосу

Бүгін, 25 желтоқсан күні, Сәтбаев университетінде ауқымды әрі маңызды іс-шаралар өтті. Алдымен, Басқарма Төрағасы – Ректордың жылдық есебі ұсынылды. Университеттің 2024 жылғы жетістіктері мен болашаққа арналған жоспарлары жан-жақты баяндалып, қатысушылар тарапынан қызу қолдау тапты.

Есептен кейін Ақсақалдар алқасының мәжілісі ГМК ғимаратындағы 258-ші аудиторияда жалғасты. Мәжіліс барысында келесі маңызды мәселелер қарастырылды:

Ақсақалдар алқасының мүшелерін келе жатқан Жаңа жыл мерекесімен құттықтап, университеттің 90 жылдық мерейтойына орай ерекше еңбегімен көзге түскен мүшелерге арнайы марапаттар табысталды.

Ақсақалдар алқасының құрамына жаңа мүшелер (А.Х.Сыздықов, С.А.Заурбеков, М.Маханов) салтанатты түрде қабылданды.

Университет басшылығы мен Кәсіподақ ұйымының атынан Ақсақалдар алқасының мүшелеріне шынайы алғыс білдіріліп, сый-сияпаттар ұсынылды.
Іс-шара жылы шырайлы қарым-қатынастармен, бір-біріне айтылған ақжарма тілектермен ерекшеленді. Жиын соңында қатысушылар үшін дәстүрлі дастархан жайылып, шынайы мерекелік атмосфера орнады.

Бұл басқосу Сәтбаев университетінің даналық пен ізгі дәстүрлерге негізделген берік бірлігі мен ұрпақтар сабақтастығын тағы бір мәрте көрсетті.