Сәтбаев университетіне Әзірбайжан Республикасы Мұнай және газ институтының делегациясы сапармен келді

Сәтбаев университетіне Әзірбайжан Республикасының Ғылым және білім министрлігіне қарасты Мұнай және газ институтының ғалымдар делегациясы келді. Делегацияны Әзірбайжан Ұлттық ғылым академиясының академигі, профессор Фахраддин Кадиров бастап келді. Делегация құрамында профессорлар Галиб Эфендиев пен Вагиф Гурбанов та болды. Оларды университет басшылығы  қарсы алды. 

— Бізді мұнай-газ саласындағы ғылыми еңбектің ұзақ тарихы біріктіреді, – деді кездесу барысында университет ректоры Мейрам Бегентаев, – Ол еңбек кеңес заманында басталып, бүгінге дейін жалғасып келеді. Бұл ынтымақтастық қарым-қатынасты біз алдағы уақытта да жалғастыруға дайынбыз.

Кездесу барысында делегация Сәтбаев университетінің ғылыми инфрақұрылымымен, жаңа зертханалармен және университеттің мұнай-газ өнеркәсібі саласындағы жетістіктерімен танысты. Әзірбайжандық ғалымдар университеттің жетістіктеріне жоғары баға беріп, болашақтағы ынтымақтастықтың жаңа бағыттарын белгіледі.

Мұнай және газ институты – Сәтбаев университетінің көп жылдық серіктесі. Соңғы үш жылда олар Қ.Тұрысов атындағы Геология және мұнай-газ ісі институтымен бірлескен ғылыми жұмыстар жүргізіп келеді. Екі институт бірлесіп «Зияткерлік кен орны» тұжырымдамасы мен мұнай-газ өндіру және өңдеу тиімділігін арттыруға арналған басқа да инновациялық технологияларды әзірлеуде.