Сәтбаев университетінің түлегі университетке оқу зертханасын сыйлады

Цифрлық технологиялар кеншілер мен шахтерлердің жұмыс қауіпсіздігін жақсартады. Сәтбаев университеті О.А.Байқоңыров атындағы Тау-кен металлургия институтында студенттерге шахталарда жұмыс істеген кезде таза ауаны үздіксіз беріп тұруға және қолданылған ауаны шығарып тұруға қажетті желдеткіш жүйелерін орнату мен пайдалануды үйрететін виртуалды шындық зертханасы ашылды. Осы үшін компьютерлерге «Тау-кен кәсіпорындарының аэрологиясы» виртуалды зертханасы» атты бағдарламалық қамтамасыз ету жүйесі орнатылған, ол шахта атмосферасындағы аэрологиялық процестер мен өлшеу құралдарының жұмысын модельдеу арқылы әсер береді. Виртуалды тренажер студенттерге кеншілердің қауіпсіздігін қамтамасыз ету үшін шахталардағы ауа қозғалысының принциптерін түсінуге мүмкіндік береді.

Зертханаға университет түлегі, тау-кен инженері және ұлағатты ұстаз, өз өмірін Сәтбаев университетімен тығыз байланыстырған көрнекті ғалым Марат Бітімбаевтың есімі берілді. Марат Бітімбаев – «Қазақстан тау-кен журналының» бас редакторы, Өмірхан Байқоңыровтың шәкірті. Ол еңбек жолын тау-кен шеберінен бастап, Индустрия және геология министрінің орынбасарына дейін көтерілді. Сөйтіп практикалық жұмысты ғылыми қызметпен ұштастырған ол 83 өнертабыстың және 39 патенттің авторы атанды. Марат Бітімбаев пен оның отбасы жаңа зертхананы Сәтбаев университетінің 90 жылдығына орай университетке тарту етті.

– Мен өзім білім алып, қабырғасында қызмет еткен университет инженерлердің жаңа буынын әлі де оқытып, даярлап жатқанын көргеніме өте қуаныштымын. Бұл менің ғана емес, Қазақстанның ғылыми-техникалық базасының негізін салуға саналы ғұмырларын арнаған барлық ұстаздарым мен ғалымдардың еңбегін мойындау деп білемін», – деді Марат Бітімбаев.

Марат Бітімбаев атындағы зертхана білікті мамандар даярлайтын оқу алаңына, ал болашақта тау-кен өнеркәсібінде қауіпсіз еңбек жағдайларын қамтамасыз ету туралы ғылыми зерттеулер мен инновациялық әдістерді әзірлейтін алаңға айналады.