Сәтбаев Университетінде «Жастықтың алауындай, жүректің қалауындай «Дос-Мұқасан» атты фестиваль басталды

28 қазан күні Сәтбаев Университетінің Досым Сүлеев атындағы Ғылым және мәдениет орталығында «Дос-Мұқасан» вокалды-аспаптар ансамблінің 55 жылдығына арналған «Жастықтың алауындай, жүректің қалауындай «Дос-Мұқасан» атты жалпықазақстандық фестивальдің бірінші күні өз жұмысын бастады.

Биылғы алтын күздің тамаша бір күні Қазақстанның түкпір-түкпірінен келген жиырмадан астам шығармашылық студенттік ұжым Алматының орталығына жиналып, «Дос Мұқасанның» құрметіне арналған фестивальда өнер көрсетіп, бірінші орынды жеңіп алуға ұмтылуда. Мұнда Алматы, Семей, Қызылорда, Қарағанды ​​және Батыс Қазақстан облысынан келген қатысушылар жиналды.

Фестивальді Мұрат Құсайынов өзінің құттықтау сөзімен ашып, жас музыканттарға сәттілік тіледі. Байқаудың екінші бөлімінде Ақжол Мейірбеков өнер көрсетті.

Байқау төрт номинация бойынша өтті: вокалистер үшін «Эстрадалық вокал» және «Дос Мұқасанның» дүниежүзілік мұрасы», өнерлі топтар үшін «Вокалды-аспаптар ансамблі» және «Заманауи аранжировка».

Ал қазылар алқасының құрамында оның төрағасы Мұрат Құсайынов, белгілі композиторлар Бейбіт Оралұлы мен Данияр Құсайынов, қобызшы Ғазиза Ғабдрахымқызы және ақын Ерлан Дәулетұлы болды. Байқаудың қорытындысы фестивальдің гала-концертінде жарияланады.

Сіздерді 29 қазан күні Гала-концертке және фестиваль лауреаттарын марапаттау рәсіміне шақырамыз. Концерт сағат 18.00-де Сәтбаев Университетінің Д.Сүлеев атындағы Ғылым және мәдениет орталығында өтеді (ТКМҒ, 2-қабат).